Kunati Mimi Kodhelit anëtar i KLGJ-së, denoncimi

Anëtarët e rinj të KLGJ-së dhe KLP-së ishin shpresa e fundit për të krijimin e një drejtësie të pavarur dhe në shërbim të popullit. Zgjedhja e tyre duhet të ishte në bazë të aftësive juridike por mesa duket në Shqipëri ende vijon të mbetet tradita e hershme e miqësive. Deputeti i Partisë Demokratike, Enkelejd Alibeaj zbuloi për “Ora News” lidhjet e disa prej anëtarëve me figura të njohura të mazhorancës dhe jo vetëm. Së pari sipas Alibeaj, një prej të përzgjedhurave nuk plotëson kuotën prej 15 vitesh eksperiencë.
“ Naurela Llagani nuk plotëson 15 vite. Është në konflikt interesi sepse ka mashtruar duke qenë në Gjykatë të Lartë duke çuar dokumente sikur punonte në shoqërinë civile dhe shoqe zyre me Ajola Xoxën.”
Një tjetër i përzgjedhur ka qenë i përfshirë politikisht me Aleancën Kuq e Zi, dhe më pas është skualifikuar nga OMN.
“Maks Çoku ka qenë sekretar zgjedhor për Partinë Aleanca Kuqezi i skualifikuar nga OMN.”
Sipas Alibeaj Gent Ibrahimi një tjetër i përzgjedhur, rezulton të jetë edhe kunati i Mimi Kodhelit, deputetes së Partisë Socialiste dhe ish-ministres së Mbrojtjes në qeverinë Rama 1.
Ndërsa i fundit është anëtar i fondacionit “Qemal Stafa”, i cili më parë drejtohej prej Saimir Tahirit, ish-ministrit të Brendshëm akuzuar për trafik ndërkombëtar droge.
“Fatmira Luli gjyqtare që ka dënuar në komunizëm me gjyqe politike. Dhe ky i fundit një Erion Muharremaj, anëtar i fondacionit “Qemal Stafa”. Ka lidhje me Saimir Tahirin? Unë po flas moralisht. Po ta them se si është kapur që tani, që me prokurorin e përgjithshëm provizor. Cili është i bilancit provizor të prokurorit të përkohshëm, Edi Rama? E ke vënë re që ky zotëria këtu përballë, Edi Rama, Taulant Balla flasin si kryeprokuror? E kanë nga subkoshienca e tyre”, tha Alibeaj në “Ora News”.