Ministrja e Turizmit dhe Mjedisit, Mirela Kumbaro ka debatuar me deputetin e Partisë Demokratike, Xhelal Mziun. Teksa Kumbaro po fliste në Komisionin e Veprimtarisë Prodhuese , për ndotjen, ka marrë si shembull Kamzën, bashki e drejtuar nga Mziu për shumë vite.
Kaq është dashur dhe deputeti i PD ka reaguar, por ministrja i ka kërkuar që mos t’i drejtohet me “Ti”, por me “Ju” pasi nuk njihen shumë me njëri-tjetrin.
“Për zaptimet pa hesap të territorit. Kemi një bashki si Kamza që ka sipërfaqen më të vogël në raport me numrin e popullsisë me dendësinë më të madhe të banorëve, që është ndërtuar në mënyrë të paligjshme. Po e marr Kamzën meqë e kemi afër. Nuk u mendua kurrë për të ndërtuar kanale”-tha ministrja.
Këtu ndërhyri Xhelal Mziu duke replikuar nga vendi, por Kumbaro iu drejtua duke i thënë që mos ta ndërpresë dhe t’i drejtohet me “Ju”.
“Zoti Mziu, ka mundësi të mos më ndërprisni, unë nuk fola për ju, nuk po flas për ju. Po flas për impiantet, a ka mundësi të mos më ndërprisni dhe mua mos më flisni me “Ti”, se nuk njihemi aq, me “Ju”, duket vetja kolegia juaj. Unë ju flas me “Ju”, dhe ju mos përdorni referenca të gabuara. Përsa kohë nuk më flisni me “Ju” nuk u kthej përgjigje”-tha Kumbaro./Opinion.al
