Gazetari Investigativ, Artan Hoxha këtë të martë në një intervistë televizive ka folur për kultivimin e kanabisit në vendin tonë.
Hoxha në fjalën e tij ka theksuar se sipërfaqja gjeografike është rritur por nuk ka publikuar një material në media, pasi tha se një vit më parë, kur e bëri një gjë të tillë i është dashur që të japë dëshmi në 6 prokurori.
“Këtë vit si një vit elektoral, ndodh një gjë e tillë, dhe këtë vit një rast i mirë ishte se policia pati kohë që të merrej më pas. Unë mund të nxjerr pamje por jam duke e verifikuar, se vitin e kaluar më kanë proceduar 6 prokurori në 6 qytete të ndryshme pasi e kanë pas më të thjeshtë të më pyesin mua por kjo gjë më përball mua me narkotrafikantët. Unë kam shkuar kudo, dhe pse mund të thoja hajdeni e më merrni dëshminë. Ajo që pashë ishte se ato donin që të përballnin gazetarin që e ka denoncuar“, ka thënë Hoxha në abc news.
Ndër të tjera ai ka bërë me dije se këtë vit trafikantët dhe kultivuesit e kanabisit kanë marrë garanci që produktin e tyre do e marrin nëse do të kultivojnë lëndën narkotike tre mujorshin që nuk kap krijimin e qeverisë së re.
Sipas Hoxhës, për sa kohë se çmimi nuk ka rënë do të thotë se sasia e kanabisit nuk ka rënë.
“Gjatë këtij viti për shkak të fushatës elektorale policia u përfshi në zgjedhje dhe këtë situatë e përdorën grupet e kanabisit të cilët kanë grupet e tyre të shpërndarë në territor, çdo vit kultivuesit mbjellin kanabi. Ato për shkak të zgjedhjeve kanë kultivuar kanabisin këtë tre mujor për t’i paraprirë krijimit të qeverisë së re. Një gjë e tillë ka ndodhur pasi ato e kanë pas të garantuar se nëse do e kultivojnë në këtë periudhë do e marrin të sigurt dhe këtë vit kamë parë se ka një shtrirje më të madhe gjeografike. Faktet deri tani janë se janë bërë shumë operacione nga policia, si në Krujë dhe në Jug ku dhe në Kukës. Shumë operacione janë zhvilluar në të gjithë vendin por bilancin e marrim në fund të vitit. Fakti është se për aq kohë se çmimi nuk ka rënë do të thotë se sasia e kanabisit nuk ka rënë. Sivjet ka një gjë ndryshe nga viti i kaluar, ku policia asgjësonte shumë dhe raportonte pak, pasi manipulonte për shkak të negociatave ndërsa sivjet raportohet e saktë sasia e sekuestruar”, është shprehur gazetari.
