Partia Demokratike ka reaguar për projektin e kullës pranë Presidencës. Për herë të parë përmendet dhe ndërtuesi, që sipas zëdhënëses së PD, Ina Zhupa është Dajlan Avdia, pronar i kompanisë më të madhe të bixhozit “Apex”.
Ndërtimi mbrapa Presidencës është vetëm njëra prej godinave të larta, që do të ndërtohet me firmat e çiftit Rama-Veliaj, duke i hapur rrugë pastrimit të parave nga biznesi i bixhozit. Aktualisht janë në ndërtim edhe kulla prapa Sahatit të Tiranës dhe ajo në zemër ish zonës së ish Bllokut. Të treja ndërtimet në zonat më të mira dhe më të shtrenjta të Tiranës i janë dhënë një personi Dajlan Avdia– pronar deri pak kohë më parë i kompanisë më të madhe të bixhozit Apex”, deklaroi ajo.
Këto fakte, Partia Demokratike i ka denoncuar disa javë më parë, duke ngritur shqetësimin se kompanitë e bixhozit, klientë të Edi Ramës, po i investojnë paratë e bixhozit në fushën e ndërtimit.
“Të treja kullat do të zënë një sipërfaqe prej 54 mijë metrash katrorë, thënë ndryshe sa 6 fusha të mëdha futbolli, të dhëna për një person, që sipas denoncimeve të medias, ka lidhje të drejtpërdrejta me vëllain e kryeministrit Olsi Rama. Edi Rama duhet t’u thotë shqiptarëve çfarë ka të veçantë Dajlan Avdia, i cili nuk ka patur kurrë më parë aktivitet ndërtimi, që i dha brenda pak muajve leje ndërtimi në 3 zonat më të shtrenjta të Tiranës, duke shkelur edhe ligjin”, vijoi zëdhënësja e PD-së.
Aktualisht për kullën prapa presidencës kanë nisur hetimet nga Prokuroria e Tiranës.
/Ri-De
