Sekretari i Përgjithshëm i Partisë Demokratike, Gazmend Bardhi i ka nisur një kërkesë për informacion Bashkisë së Tiranës lidhur me projektin e kullave luksoze që është bërë publik në media.
Sipas projektit kulla luksoze do të ndërtohen në truallin që ndodhet aktualisht në selinë e Partisë Demokratike. I ftuar në emisionin Opinion, Bardhi tha se nuk kishte informacion lidhur me projektin dhe se mes PD e shtetit ka një kontratë që i jep Parisë Demokratike të drejtë përdorimi të godinës për 99 vite.
Në emisionin Opinion, Bardhi u shpreh se do t’i drejtonte një shkresë Bashkisë së Tiranës dhe do të kërkonte informacion mbi projektin.
Ndërsa sot, përmes një deklarate për mediat PD ka publikuar edhe 4 pyetjet që i ka drejtuar Bashkisë së Tiranës. PD kërkon informacion të detajuar se kur është dorëzuar zyrtarisht projekti, kush janë propozuesit apo financuesit e projektit, cilat kanë qenë procedurat e ndjekura nga bashkia etj…
“Sekretari i Përgjithshëm i PD kërkesë për informacion Bashkisë së Tiranës. 4 pyetje mbi projektin.
Në datën 13.01.2022, media bëri publike një ide projekt ku parashikohej ndërtimi i tre kullave, pikërisht në territorin ku ndodhet selia qendrore e Partisë Demokratike. Në mungesë informacioni mbi këtë projekt, Sekretari i Përgjithshëm i PD Gazment Bardhi i ka dërguar një kërkesë për informacion Bashkisë së Tiranës, ku kërkon që t’i vihet në dispozicion një informacion të plotë dhe të detajuar, për sa më poshtë:
- Kur është dorëzuar zyrtarisht projekti “Four Freedoms Park” pranë Bashkisë Tiranë, dhe kush kanë qenë propozuesit/financuesit e këtij projekti? A ka pasur gjatë ditëve të fundit një përpjekje nga propozuesit e projektit apo persona të tjerë për riaktivizimin e këtij projekti?
- Cila ka qenë procedura e ndjekur nga Bashkia Tiranë lidhur me trajtimin e këtij projekti? A ka pasur një prezantim të këtij projekti pranë zyrave të Bashkisë Tiranë? Nëse po, kush kanë qenë pjesëmarrësit privatë dhe institucionalë gjatë këtij prezantimi? Kujt i është njoftuar ky projekt deri më tani?
- A ka pasur një vendimmarrje lidhur me këtë projekt? Nëse po, ju lutem të na vini në dispozicion aktet përkatëse, duke na sqaruar edhe cili është statusi aktual i këtij projekti dhe nëse sipas rregullave në fuqi të planifikimit të territorit a lejohet ndërtimi në zonën e propozuar?
- Ju lutem, na vini në dispozicion praktikën e plotë shkresore që disponon Bashkia Tiranë lidhur me projektin “Four Freedoms Park”, nga momenti i dorëzimit të tij deri në datën e marrjes së kësaj kërkese”-thuhet në shkresën e PD./Opinion.al
