Gjykata e Kukësit shpalli fajtorë 25 protestues të cilët dogjën toll-et në Rrugën e Kombit gjatë protestës së 31 marsit. Gjykata ka dhënë për shumicën e tyre (20 protestues) dënim me 4 deri në 8 muaj, por që janë liruar me kusht. Pra, ata duhet të paraqiten pranë Shërbimit të Provës sipas kalendarit të përcaktuar nga gjykata.
Dy protestues u dënuan me kohën e paraburgimit, ndërsa tre të tjerë me gjobë nga 100 mijë lekë (të reja).
Vendimi u dha nga trupa gjykuese e kryesuar nga Kryetari i Gjykatës së Kukësit Isuf Shehu.
Të akuzuarit kanë pranuar akuzat e prokurorisë dhe gjykata vendosi të pranojë marrëveshjen e arritur mes akuzës dhe të akuzuarve.
Pra pas afro 3 muajsh mbyllet historia e kukësianeve që u shoqërua me debate të ashpra dhe protesta nga opozita. Tashmë ata kanë lënë të gjithë qelitë.
