Kukësi e nisi sezonin me trofe duke marrë Superkupën e Shqipërisë. Skuadra e Ernest Gjokës fitoi me rezultatin 3 – 1 finalen me Skënderbeun, e zhvilluar në Tiranë.
Një tjetër dështim i korçarëve pas atj të vitit të kaluar me Laçin, për të njëjtin trofe. Sfida ishte luftuar gjatë të gjithë minutave, ndërsa ekipet vinin me ndryshime nga sezoni i kaluar. Goli i parë në këtë përballje ishte i Kukësit.
Matija Dvornekovic mundi Orges Shehin, në mesin e pjesës së parë. Barazimi erdhi pas pak minutash. Masato Fukui realizoi për kampionët e Shqipërisë. Ekipet ishin njëlloj kërkuese edhe kur u kthyen në fushë pas pushimit.
Goli i Izair Eminit në të 75’ i dha përsëri avantazhin Kukësit, por nuk përfundoi me kaq. Pero Pejiç, i cili u afrua këtë verë te Kukësi pas një sezoni në Iran, realizoi golin e sigurisë në minutat shtesë. Përpjekjet e mëvonshme për Skënderbeun nuk ndryshuan asgjë. Kjo finale u zhvillua dy javë para nisjes së kampionatit.
