Kukësi ka arritur të fitojë me rezultatin 2-1 kundër Sherif Tiraspolit, ndeshje e vlefshme për turin e dytë të Champions League. Megjithëse kampionët e Shqipërisë dominuan në çdo aspekt, këtë mbrëmje fati nuk qe në anën e tyre të cilët janë të detyruar të mbyllin aventurën europiane pasi janë mposhtur në ndeshjen e parë me rezultatin e ngushtë 1-0.
Pjesa e parë u mbyll me rezultatin 2-0 në favor tanëve. Fillimisht ishte Izair Emini që bëri gjithçka mirë brenda zone duke shënuar golin e parë të takimit. Verilindorët ishin këmbëngulës dhe në fundin e këtij fraksioni loje, Emini jep një asis për Pejiç i cili nuk e ka të vështirë të dyfishojë rezultatin.
Edhe pjesa e dytë, ashtu si e para flet për kampionët e Shqipërisë, të cilët patën shumë raste për të shënuar gola të tjerë. Atëherë kur nuk pritej, në minutën e 56-të miqtë shënojnë me Baidal. Më pas Kukësi ishte i tëri në sulm. Në minutën e 80-të në favor tanëve akordohet penallti, por Pejiç tregohet i pasaktë. Kështu mbyllet kjo ndeshje dhe aventura europiane përfundon këtu për kampionët e Shqipërisë.
