“Superministri” i Edi Ramës, Saimir Tahiri është personi më i folur dhe më i shigjetuar i momentit. Disa përgjigje të policisë italiane kanë zbuluar emrin e tij në bisedat e trafikanëteve të drogës që vetë Tahiri tha se i ka kushërinjtë të 10-të. Por çfarë qendrimi mbajti Edi Rama përballë kësaj fortune që ka shpërthyer ndaj Saimir Tahirit: E kam mbështetur, por organet ligjzbatuese, duhet t’i shkojnë deri në fund e pa humbur kohë kësaj historie. Të njëjtat fjalë Kryeministri përdori edhe në 2013 për mikun e tij “superkryetarin” e Vlorës, Shpëtim Gjika, të cilin e dorëzoi lehtësisht kur u arrestua për shpërdorim detyre.
Edi Rama për Saimir Tahirin, tetor 2017
DUAM TË VËRTETËN! SA MË PARË!
Është e neveritshme dhe shokuese çka ka dalë prej bisedave të dy kriminelëve!
Saimir Tahirin e njoh prej vitesh dhe kam pasur vetëm fjalë mbështetjeje e inkurajimi për të, si person me qëllime të mira, aftësi dhe integritet.
Por Shqipëria dhe shqiptarët sot duan e meritojnë të dinë të vërtetën, vetëm të vërtetën dhe asgjë tjetër përveç të vërtetës. Prandaj të gjitha organet ligjzbatuese, duhet t’i shkojnë deri në fund e pa humbur kohë kësaj historie, për të hedhur dritë të plotë mbi faktet.
Vetë qeveria e re është krijuar për të mos falur e as toleruar këdoqoftë, që zgjedh rrugën e krimit në vend të rrugës së Shqipërisë që duam – Me shtet, punë, mirëqenie.
Asnjë luhatje. Asnjë rezervë. Asnjë dyshim: Lufta jonë me krimin do të vazhdojë në çdo ditë me edhe më shumë forcë. Deri në fund!
Rama për Shpëtim Gjikën tetor 2013
Shpëtim Gjika është mik dhe figurë e lartë e PS në krye të një prej qyteteve më të rëndësishëm të Shqipërisë. Akuza tejet e rëndë dhe faktet tejet të rënda. Të gjithë ndihemi keq nga abuzimi dhe duam të shpresojmë se një abuzim kaq skandaloz me detyrën nuk qëndron.
Si socialist dhe mik i Shpëtim Gjikës, unë ndihem keq për të dhe në çfarëdo situate do jem njerëzisht pranë tij dhe familjes së tij dhe sikur ai të ketë gabuar aq rëndë. Por, si kryeministër unë inkurajoj prokurorinë të bëjë detyrën deri në fund dhe duam që drejtësia dhe jo politika të thotë fjalën e fundit lidhur me të. /Opinion.al
