Nisur nga numri i lartë i aksidenteve, shpeshherë edhe me vdekje, Policia Rrugore ka dalë me një plan masash për të normalizuar situatën. Vetëm dy ditë në parë, nga një pakujdesi e drejtueses së mjetit, humbën jetën dy persona në Kamëz dhe 2 u plagosën. Në një njoftim për mediat, drejtori i Policisë Rrugore, Mit’hat Tola tha se përpos efektivëve do të ketë në terren edhe civilë që monitorojnë drejtuesit e mjeteve.
“Për realizimin me efektivitet të kontrolleve nga shërbimet e Policisë Rrugore, për identifikimin e këtyre shkeljeve janë angazhuar shërbime policore rrugore “civile” me mjete “jo të uniformuara” të policies”, tha Tola.
Opinion.al u interesua dhe mësoi se policët civilë janë në terren që sot. Ata nuk do mund të identifikohen nga shoferët pasi jo vetëm janë civil por do lëvizin me makina pa logo policie. Burime të policisë thanë se “civilët” do të fotografojnë mjetet dhe do të informojnë në radio grupin e policisë me të afërt me zonën. Më tej janë policët rrugore ata që vendosin gjobat. Si fillim civilet do vendosen në Tirane e mandej në rrethe.
Po kështu, Tola u bëri thirrje qytetarëve të bashkëpunojnë. “çdo qytetar dhe drejtues mjeti të denoncojnë në numrin falas 112 dhe në aplikacionin “Komisariati Digital” duke dërguar imazhe dhe foto mbi shkeljet që ndeshin në akset rrugore, si parakalime të gabuara, shpejtësi tej normave etj, duke u garantuar reagim të shpejtë dhe profesional nga ana e Policisë së Shtetit”, tha ai.
