Kryeministri Edi Rama, teksa po mbante fjalën e tij në dorëzimin e 155 banesave për familjet e Thumanës ka zgjedhur t’iu përgjigjet edhe atyre që i akuzuan për “avullim të milionave parave të dhëna nga donatorët”.
Sipas Ramës, puna fillon me studimin, projektin, kontratat dhe në fund është realizimi. Ai u shpreh se çdo punë do kohën e vet.
“Nëse Elvisi nuk donte që të t’i kthente përgjigje atyre që në mënyrë të përsëritur akuzuan këtu se ikën lekët e shtëpive, u tretën paratë e donatëorëve, u avulluan miliardat e dhëna nga bota, unë me thënë të drejtën nuk i lë dot pa iu kthyer përgjigje. Veprat fillojnë kur fillon puna për studimin pastaj për projektin, kontratat dhe pastaj vijmë tek realizimi. Vazhduam me të gjithë transformimin e infrastrukturës për të ardhur tek projekti që të ndërtoheshin shtëpitë. Çdo punë do kohën e vet. Së bashku ne realizuam atë që ne nuk e kemi gjetur në asnjë plan rindërtimi, që të ju japim shtëpitë falas, qoftë dhe përmes një kredie të butë që ndodh në Itali, Greqi. Bashkë me bashkinë po bëjmë dhe disa punë të tjera që kanë mbetur, qoftë për qendrën shëndetësore, qoftë dhe për një park lodrash për fëmijët. Thumana është një model zhvillimi të qëndrueshëm urban dhe social. Shumë lagje të vendit tonë do të donin të ishin si Thumana”,-tha Rama.
