Shqiperi-Serbi rezulton të jetë ndeshja më e kërkuar nga tifozët Kuq e Zi, ndoshta duke lënë pas edhe kërkesat për bileta ndër vite me skuadrat “big” të kontinentit si Gjermania, Anglia apo Portugalia. Por ndërsa kërkesat janë të larta, diçka e çuditshme po ndodh nën rrogoz. Federata Shqiptare e Futbollit u shpreh në një njoftim të sajin se nga dita e martë ka nisur shitja e biletave online të cilat do të jenë të personalizuara. Por në realitet dje jane hedhur në treg vetëm 300 bileta online, ndërkohë që kapaciteti i stadiumit Elbasan Arena ku do të luhet ndeshja është 12 mijë vende. Ku shkuan biletat e tjera online?!
Zëra ende të pankofirmur thonë se, për të shmangur incidentet në një ndeshje të “nxehtë” si ajo me Serbinë, Federata Shqiptare e Futbollit ka parë të udhës që biletat që nuk dolën në shitje të blihen nga grupe tifozerish tashmë të njohura, të cilat do të jenë më të lehtë për tu kontrolluar. Ndërkohë që ky “vendim” penalizon ata sportdashës që nuk janë pjesë e grupimeve të tifozerisë që mbushin stadiumin në ndeshjet kur luan Shqiperia. Gjithsesi gjithçka mbetet në kuadrin e thashethemeve pasi vetëm në ditët në vazhdim do të shikohet se sa i vërtetë është ky lajm.
