Imazhet satelitore që tregojnë lëvizjet e anijeve luksoze të përdorura shpesh nga lideri i Koresë së Veriut, Kim Jong Un dhe shoqëruesit e tij, japin indikacione se ai gjendet në resortin e tij bregdetar, në zonën e Wonsan.
Zyrtarët në Korenë e Jugut dhe Shtetet e Bashkuara thonë se Kim mund të gjendet atje, ndoshta për të shmangur ekspozimin ndaj koronavirusit të ri. Megjithatë, ata paralajmërojnë se shëndeti dhe vendndodhja e Kim ruhen me skepticizëm.
Sekretet dhe informacionet zyrtare janë të vështira për t’u besuar në Korenë e Veriut. Hera e fundit që media zyrtare në Korenë e Veriut raportoi për vendndodhjen e Kim, ishtë në datë 11 prill, por ka vazhdimisht lajme që ai dërgon letra dhe mesazhe diplomatike.
Kim besohet të ketë rreth 13 resorte të rëndësishme në të gjithë vendin, megjithëse ai duket se përdor rregullisht, vetëm gjysmën prej tyre, dhe i preferuari mbetit ai në Wonsan. Kompleksi në bregdetin lindor të vendit, përbëhet nga disa vila për të ftuarit, një plazh privat, fusha basketbolli dhe stacion privat treni.
Spekulimet për shëndetin dhe vendndodhjen e Kim shpërthyen pas mungesës së tij në festimet e 15 prillit, dita kur festohet ditëlindja e gjyshit të tij të ndjerë dhe njëkohësisht themeluesit të Koresë së Veriut, Kim Il Sung./Opinion.al
