Ministri i Brendshëm, Sandër Lleshaj, gjatë seancës plenare të ditës së sotme ka folur për dekretin e presidentit Ilir Meta, i cili ktheu për rishqyrtim ligjin për Policinë e Shtetit.
Lleshaj e ka cilësuar këtë veprim të presidentit si akt të mirëfilltë politik. Gjithashtu, Lleshaj deklaroi se ky ligj vjen pas diskutimit me partnerët ndërkombëtarë dhe për këtë arsye i ftoi deputetët që ta rivotojnë.
“Në thelbin e këtij akti politik, presidenti pretendon se dhënia e kompetencës për mbikëqyrje të veçantë për Policinë e Shtetit, rrezikon të shkelë të drejtat e njeriut për arsye se është në varësi të ministrit të Brendshëm. Ndërkohë që demokracitë funksionojnë mbi këtë parim. Qeveria kontrollon dhe duhet ta kontrollojë administratën dhe burokracinë përndryshe demokracia do ishte në rrezik. Edhe ne kur kemi hartuar ndryshimet në ligj dhe presidenti që e ka kthyer i referohemi të njëjtit nen 221. Presidenti ka lexuar vetëm 4 pikat e para, ne kemi lexuar dhe të 5-ën. Në thelb kodi i procedurës penale thotë që duhet të rregullohet veçmas dhe ne kemi rregulluar veçmas me parimet më të mira europiane dhe i japim policisë më pak atribute. Procedura ka qenë nën mbikëqyrjen e SPAK dhe SHÇBA-së. Duke e konsideruar aktin e kthimit të ligjit si akt të mirëfilltë politik, pa asnjë brendi juridike, duke theksuar faktin se ky ligj ka kaluar një proces të gjatë diskutimi, filtër diskutimi me partnerët tanë ju ftojmë ta votojmë dhe t’i hapim rrugë zbatimit të tij”, deklaroi Lleshaj./ Opinion.al
