Ministri i Shtetit për Marrëdhëniet me Parlamentin, Taulant Balla deklaroi se vendimi i Gjykatës Administrative që ktheu në Parlament deputetët e opozitës është i përkohshëm.
Ai tha se ky vendim do të vijojë të shqyrtohet edhe në instanca të tjera gjyqësore.
“Vendimi i Gjykatës Administrative është vendim i ekzekutueshëm, i përkohshëm, që do të vijojë të shqyrtohet edhe në instanca të tjera gjyqësore, por jemi në një situatë që i bën mirë Kuvendit. Deputetët e opozitës janë ulur në sallë dhe po diskutojmë buxhetin faktik. Dy gjëra ka Kuvendi që janë të natyrës së pastër politike: kur votohet qeveria dhe buxheti. Mundësia më e artë e opozitës është diskutimi i buxhetit.
Ne jemi përgatitur për të dhënë llogari para Kuvendit dhe para publikut. Në një pjesë të komisioneve ka nisur diskutimi i buxhetit, që është më i madhi që ka pasur Shqipëria që nga viti 1912. Na keni lënë buxhet me 2,8 miliardë euro, e kemi kthyer në 8,2 miliardë euro dhe tani dua të ndaj me Kuvendin diçka që më bëri shumë përshtypje nga raportimi në Parlamentin Europian i Komisioneres së re për Zgjerimin. Ajo tha se negociatat e anëtarësimit mund të përfundojnë deri në fund të vitit 2027. Shqipëria duhet të merret shembull nga shtetet e tjera të rajonit, tha ajo”, shtoi Balla.
