Pa shumë entuziazëm është pritur në Rinas pëshngritësja Romela Begaj, e cila pak ditë më parë u shpall kampione në stilin e shkëputjes në Shtetet e Bashkuara të Amerikës.
Në prononcimin e dhënë për mediat menjëherë pas daljes nga aeroporti “Nënë Teresa” , Begaj ka folur për kënaqësinë që i dha medalja, dëmtimin në shpinë dhe për organizimin që u bë për ta pritur atë.
“Shumë mirë, një paraqitje dinjitoze, dhe për shumë pak ikën dhe shumë medalje te tjera. Sportisti gjithmonë synon më të mirën dhe pritshmëria ime ka qenë përherë të jem në podiumet europiane dhe botërore se kam 1 vit që po stervitem për këtë garë. Këtë atmosferë nuk e prisja por nuk ka aspak rëndësi dalja për të më pritur mua, rëndësi ka që unë bëj atë që dua, duke u shpërblyer dhe me medalje.
Dëmtimi në shpinë më ndali hovin për të luftuar edhe për medalje të tjera dhe mungesa e një fizioterapisti ishte një mungesë e cila u ndje por kjo ndodhi dhe shpresoj që mos të përsëritet më”, tha Begaj.
“Jam kënaqur me arritjen time u vlerësua sakrifica ime, e kam marrë me gjak këtë rezultat nuk ishte e lehtë. Medalja olimpike është ende larg por e kam synim ta arrijë. Medalja e artë nuk ishte vetëm për mua por për Shqipërinë,” shpjegoi Begaj.
