Në Pogradec thuhet se kryetarin e bashkisë nuk mund ta takosh pa marrë më parë aprovimin e Ermir Pashollarit. Ai mban postin e shefit të kabinetit të kryebashkiakut Eduart Kapri dhe është baxhanaku i tij.
BIRN shkruan se Kapri ka emëruar një numër të afërmish dhe familjarësh në administratën e bashkisë, apo të ndërmarrjeve publike që varen prej saj.
Emërime të tilla janë në kundërshtim me ligjin, megjithatë kryebashkiaku nuk duket i shqetësuar. “U ofrova një mundësi, por kjo nuk është afatgjatë,” u shpreh ai. “Edhe sikur unë të dua nuk mundem sepse i bie pastaj që unë të merrem me punën e çdo njërit aty,” ka thënë Kapri.
Punësimet e familjarëve në Bashki
Luan Pashollari – babai i baxhanakut dhe shefit të kabinetit të kryetarit të bashkisë, është sot në krye të zjarrfikësve. Përpara se të emërohej në krye të zjarrfikësve të qytetit, Luani ka shërbyer në policinë e shtetit – nga e cila u larguar në vitin 2006 për mungesë të arsimit përkatës.
Nipi i djalit të motrës Marsel Isallari, është emëruar si drejtor i ndërmarrjes të ujësjellës kanalizimeve Pogradec.
Të fejuarën e nipçes drejtor, Viola Cicin, Kapri e ka emëruar në krye të Drejtorisë Ekonomisë dhe Turizmit në bashki.
Një tjetër kushëri i kryetarit, Altin Bardhi, është emëruar në postin e kryeinspektorit në bashki, por megjithatë Kapri shprehet se tashmë e ka shkarkuar pasi kishte performancë të dobët.
BIRN që ka sjellë faktet e lartpërmendura thotë se Kapri nuk është penduar për zgjedhjen që ka bërë. “Unë kam qenë i prirur të zgjedh stafin më të mirë, më të specializuar dhe njerëzit që unë i mendoj qe kanë karakter dhe dinë të suportojnë marrëdhëniet me publikun që të mos arrijnë në ato gjëra që deri dje nuk i kemi pëlqyer,” është shprehur ai, duke shtuar se ato që nuk kanë pasur performancën e duhur janë zëvendësuar.
