Gjatë këtyre dy ditëve, qarku i Fierit ka prodhuar disa lajme, si protestat kundër qeverisë, arrestimi i disa protestuesve, plagosja e një polici, aktivitetet e kryeministrit Edi Rama dhe deklaratat politike të këtij të fundit.
Por, kryetari i Partisë Demokratike në Fier, Luan Baçi, në një intervistë për “Ora News” ka thënë se plagosja e policit gjatë protestës sot në Fier, ishte inskenim.
“Shpreh keqardhje, distancohem nga kjo dhunë. Po të dija se ishte një simpatizant, votues, dashamirës i PD, nuk do ta quaja pjesë të PD-së atë që ka bërë një akt të tillë. Por nga informacionet që kam, jam interesuar në spital nga kirurgë dhe më kanë thënë se nuk ka pasur qepje siç thonë në portale por gërvishtje nga një mjet i fortë, qoftë dhe gur që ka dalë nga turma. Por nuk e di nëse ka qenë protestues apo i infiltruar për ta bërë një gjë të tillë pasi ka pasur me dhjetëra punonjës policie civilë që qarkullonin në mes të turmës së protestuesve dhe janë të identifikuar .Çdo gjë ka qenë e inskenuar për të krijuar një përplasje”, ka thënë Baçi.
Duke komentuar transferimin e drejtorit të Policisë së Fierit, Baçi thotë se ai u shkarkua sepse nuk i menaxhoi si donte protestat sipas urdhrave politikë./Opinion.al
