Kryeredaktori i gazetës “Rilindja Demokratike”, Bledi Kasmi ka folur për herë të parë në emisionin “Opinion” pas incidentit që ndodhi në protestën e opozitës ditën e shtunë. Gazetari Kasmi ka treguar momentet e para se si u tensionua situata mes protestuesve dhe policisë, pikërisht në momentin kur vet ai u qëllua me shkop gome në kokë nga efektivët. Ai deklaroi se në protestën e organizuar nga opozita e bashkuar ka qenë si gazetar dhe jo si protestues.
Kasmi në studion e emisionit ‘Opinion’, ndërsa shpjegonte rreth asaj se çfarë ndodhi, theksoi se u gjend në një pozicion jo të duhur, pasi ishte duke realizuar disa fotografi për t’i postuar menjëherë në versionin online të gazetës së RD-së.
Kryeredaktori deklaroi se sulmi ndaj tij erdhi për shkak të detyrës, pasi ishte i vetmi që u sulmua. Në lidhje me shtyrjen e paretës metalike të gardhit rrethues, tha se nuk kishte rrugë tjetër, pasi duhej të shpëtonte se situata u vështirësua, duke nënkuptuar se nuk ishte pjesë e protestuesve, por pjesë e shtypit.
“Shkopi që më goditi nuk është i gomës, por është një shkop metalik hekuri. 10-15 centimetrat e para ky shkop i paska gome. Në momentin që goditet ka një pjesë hekuri. Ai është një shkop me hekur. Po ta shihni ne video, ka një moment të rëndësishëm, polici vjen nga pas dhe shkëmbehet me tjetrin dhe më godasin vetëm mua. Për ‘pse’-n duhet të pyesim. Sapo u godita, ika menjëherë. Ishin edhe dy deputetë të PD që më ndihmuan. Aty nuk kishte çarje rrethimi, pasi nuk ishte protestë e dhunshme. Nuk kishte goditje me gurë,”- tha Kasmi.
Ai tregoi edhe për momentin pas goditjes nga policia dhe si arriti të dalë nga grumbulli i madh i protestuesve që në ato çaste po përlesheshin me efektivët e policisë.
Kasmi tregoi se drejtori i policisë, Ardi Veliu ishte i vetmi që kontaktoi më të gjatë kohës që ishte i shtrirë në Spitalin Ushtarak. Më tej, deklaroi se do të kallëzojë penalisht efektivët e policisë, por ky veprim do merret edhe me konsulencën e avokatëve të tij.
