Vangjush Dako është revoltuar me Lulzim Bashën, pasi ky i fundit e ka akuzuar publikisht se Dako është përgjuar nga shërbimet e huaja sekrete duke komunikuar me kriminelë. Edhe pse Basha ka një muaj që e ka artikuluar këtë akuzë, Dako është kujtuar sot ta kërcënojë Bashën me padi penale për shpifje. Nuk dimë nëse për këtë reagim të vonuar ka ndikuar emërimi i një kryeprokuroreje nga mazhoranca, por opozita disa herë ka paralajmëruar se Ramës i duhet një prokuror i përkohshëm për të penguar hetimet për eksponentë të saj.
Më poshtë statusi i plotë i Dakos në facebook
“Kam vendosur ta çoj në gjyq Lulëzim Bashën, si një shpifës profesionist që e ka kaluar cakun e tolerancës time. Ky njeri që gënjen sy për sy kë t’i dalë përpara, një i paaftë që si kryetar bashkie la kokrrën e namit me paaftësinë e me gënjeshtrat e tij dhe si kryetar i opozitës e ka bërë qesharake Partinë Demokratike, duhet të përgjigjet përpara drejtësisë për shumë gjëra.
Por nëse për ato të rëndat fare me dëme ekonomike kolosale, do t’i japë patjetër përgjigjet e veta përballë institucioneve të reja të reformës në drejtësi që ai po bën çmos ta bllokoje, me mua do të përballet e do të përgjigjet përpara gjykatës për shpifjet e tij prej mashtruesi profesionist.
Kam marrë vesh që ky karafil nuk shkon në gjyqet ku e çojnë njerëzit që i akuzon me shpifjet e tij ordinere!
Por vjen s’vjen në gjyq të perballet me modelin e shpifur politik që ai mishëron, unë e kam ndarë mendjen që të mos i ndahem derisa të gjithë baltën e tij ta gëlltisë mbrapsht në sytë e gjithë popullit”.
