Policia serbe është e angazhuar në mbledhjen e informacioneve dhe dëshmive të nevojshme për të gjetur vrasësin e liderit të SDP-së, Oliver Ivanoviç. Kështu ka deklaruar drejtori i Policisë në Serbi, Vladimir Rebiç për RTS. Ai ka përsëritur kërkesën për të qenë zyrtarisht pjesë e hetimeve që po kryhen në Kosovë për ngjarjen e rëndë. “Autoritetet ende nuk kanë marrë ndonjë përgjigje nga EULEX-i dhe UNMIK-u lidhur me kërkesën për përfshirjen tonë në hetimin e vrasjes së Ivanoviçit”, ka theksuar ai.
Oliver Ivanoviç u vra mëngjesin e së martës në Mitrovicën Veriore para selisë së partisë së tij. Sipas autopsisë Ivanoviç u qëllua me gjashtë plumba nga një pistoletë e tipit Zastava M7oA, prodhim serb. Të shtënat nuk janë dëgjuar në zonë dhe dyshohet se autorët kanë përdorur silenciator. Një makinë u gjet e djegur jo shumë larg vendit të ngjarjes dhe dyshohet se është përdorur nga autorët. Nuk ka ende asnjë informacion zyrtar rreth pistës së hetimeve. Ato po kryesohen nga një prokuror shqiptar dhe një serb.
