Kryetarja e Parlamentit të Bullgarisë, Nataliya Kiselova ka deklaruar se mbështet Shqipërinë lidhur me anëtarësimin e saj në unionin evropian.
Në një deklaratë të përbashkët për shtyp me kryetaren e Kuvendit të Shqipërisë, Elisa Spiropali, Kiselova është shprehur se Bullgaria e sheh integrimin e Shqipërisë në Bashkimin Evropian si një faktor stabiliteti për Ballkanin Perëndimor.
“E nderuar zonja kryetare,
Në vend të parë deshiroj të përgëzoj Shqipërinë për rritjet serioze që janë bërë për procesin e anëtarësitmit në BE. Ju jeni kampion në përpjekjet për integrim të plotë në BE.
Shteti bullgar, jo vetëm kuvendi por edhe qeveria, pavarësisht nga politikat, e mendon integrimin e plotë të Shqipërisë si një faktor stabiliteti për Ballkanin Perëndimor. Kuvendi bullgar do bëjë përpjekje për të ndihmuar në rast nevoje, për punën tuaj intensive gjatë viteve të ardhshme, në mënyrë që të gëzojmë së bashku kur të jemi të gjithë pjesë e BE”, u shpreh Kiselova.
Përsa i përket rezultatit të zgjedhjeve të 11 Majit, ajo beson se do të ketë një bashkëpunim të ngushtë midis komisioneve parlamentare.
“Legjislatura juaj do nisi në shtator e besoj do ketë një bashkëpunim të ngushtë të komisioneve. Do ndihmojmë në çdo gjë që nevojitet, e në kuadër të NATO-s, e në kuadër të organizatave ndërkombëtare. Së bashku do punojmë për paqen dhe sigurinë e Ballkanit”, përfundoi ajo.
