TIRANË- Zërave për një përplasje Ruçi-Kokëdhima në mbledhjen me dyert të mbyllura të së hënës, duket se po vertetohen. Deputetët socialistë të pyetur nëse janë dakord për shtyrjen e datës së Kongresit, siç ka propozuar Kokëdhima, shprehen kundër. Erion Braçe i pyetur për këtë propozim tha se nuk e njeh. “Unë nuk di të ketë ndonjë propozim për të ndryshuar datën e Kongresit, dhe e dyta, nuk ka asnjë vendim të forumit të partisë për të shtyrë këtë datë. Ne kemi bërë sot mbledhje për dy rajone, atë të Fierit dhe Beratit dhe natyrisht që jemi brenda afateve të vendosura nga Asambleja Kombëtare e Partisë Socialiste për të kapur kongresin në janar”, tha Braçe për mediat.
Edhe anëtarja e kryesisë së PS-së, Valentina Leskaj, dhe deputete në Vlorë në të njëjtin qark me Kokëdhimën tha se nuk mund të jap përgjigje për një propozim jo zyrtar. “S’di të ketë propozim zyrtar”, tha shkrut ajo. Po kështu edhe Fino mohoi të ketë diçka konkrete për të shtyrë datën e Kongresit. “E kam lexuar në gazetë dhe jam befasuar”, tha ai, ndërsa shtoi se “çdo njeri që do të bëjë propozim, le ta bëjë në Asamblenë Kombëtare të PS”.
Si Fino ashtu dhe Klodiana Spahiu deputete e Durrësit, thanë se puna në qytetet e tyre po ecën me ritme të shpejt përsa i përket zgjedhjeve në bazë.
