Kryeministri Edi Rama ka sulmuar përsëri me akuza dhe shpifje, nga foltorja e Kuvendit të Shqipërisë, gazetaren e AbcNews, Erisa Zykaj. Ai ka manipuluar opinionin publik duke thënë të pavërteta sikur pyetja e gazetares ka patur prapavijë politike dhe se ajo ka qenë e indoktrinuar meqënëse e ka pyetur kryeministrin për një raport të shërbimeve sekrete për lidhje të zyrtarëve të policisë me trafikantë të kanabisit.
Rama, siç duket edhe në videon më poshtë, i referohet pyetjes që gazetarja e AbcNews i ka drejtuar atij sot gjatë një konference shtypi në Bruksel për trafikun e drogës, por që në vend të përgjigjes në kryeqytetin belg ka marrë fyerje nga kryeministri në Tiranë. Edi Rama nuk ka guxuar ta bëjë një gjë të tillë në Bruksel, ku edhe një vit më parë ka shfaqur një sjellje arrogante ndaj gazetares, por është ndjerë “i fortë” në Tiranë për të fyer gazetaren në mungesë, raporton lapsi.al.
Sigurisht që problemet e shumta të kryeministrit nuk janë përgjegjësi e medias dhe për rrjedhojë ato nuk mund të zgjidhen duke sulmuar atë. Në këtë rast, thjesht dëshmojnë krizën e rëndë të një lideri në degradim të plotë politik. Të merresh me gazetarët dhe jo problemin është një sëmundje e vjetër e politikanëve të dështuar.
Kryeministri Rama, duhet të jepte përgjigje për akuzat që rëndojnë mbi qeverisjen e tij për implikime në trafikun e drogës dhe për raportin e Amnisty International që evidentonte lidhjet e zyrtarëve të lartë me krimin dhe korrupsionin.
Rama gjithashtu kishte detyrim të bënte transparencë përpara shqiptarëve edhe për paratë që u paguan për fluturim charter që e solli nga Brukseli në Tiranë.
