Kryeministrja e Zelandës së Re Jacinda Ardern ka takuar përfaqësuesit e komunitetit mysliman në vend, ku dha një mesazh të fortë duke vendosur edhe shaminë. Ardern ka konfirmuar se zyra e saj ka marrë manifestin e terroristit që vrau 50 persona në dy xhamitë e qytetit Christchurch 9 minuta para sulmit të së premtes. “Isha ndër 30 personat që u ishte dërguar manifesti, 9 minuta përpara sulmit”, ka thënë Ardern.
“Dokumenti nuk jepte detaje specifike për sulmin”, tha ajo, duke shtuar se brenda dy minutash e-maili i është dërguar Shërbimeve të Sigurisë. Kryeministrja e Zelandës së Re ka përsëritur premtimin për të ndryshuar ligjin mbi armët dhe ditën e hënë do të zhvillojë diskutimet me kabinetin qeveritar. Ndryshe nga Shtetet e Bashkuara të Amerikës, në Zelandën e Re zotërimi i një arme nuk përcaktohet me Kushtetutë, ndaj mendohet se do të jetë më e lehtë për qeverinë që të ndryshojë ligjin./Opinion.al
