Kryeministrja e Hong Kongut, Carrie Lam u shpreh se dhuna e këtyre 3 muajve gjatë protestave duhet të marrë fund, pasi qyteti është rrënuar. Për këtë arsye ajo është shprehur se së bashku me ekipin e saj do të nisin dialogun me qytetarët.
“Shoqëria e Hong Kongut ka grumbulluar shumë çështje të thella ekonomike, sociale dhe madje edhe politike. Shpresoj se këto forma të ndryshme të dialogut mund të ofrojnë një platformë për të diskutuar”, -tha Lam në një konferencë për mediat.
Megjithatë Lam theksoi se platforma e dialogut nuk nënkupton se autoritetet nuk do të ndërmarrin veprime për të ndalur dhunën. Hong Kongu, një ish-koloni britanike është përfshirë prej 3 muajsh në protesta që shpesh kanë qenë të dhunshme.
Shkaku i tyre kanë qenë një një projektligj për ekstradimin, i cili lejonte që njerëzit të dërgoheshin për t’u gjykuar nga Hong Kongu në territorin e Kinës. Ndonëse autoritetet e tërhoqën projektligjin protestat vijuan sërish pasi kërkesat e protestuesve u shtuan./Opinion.al/
