Kreu i Grupit Parlamentar i LSI-së, Petrit Vasili, ka kritikuar intervistën e kryeministrit Edi Rama dhënë ditën e sotme nga Nju Jorku për Zërin e Amerikës, i cili, tha se banorët e Shkozës nuk meritojnë shpronësim dhe as dëmshpërblim, pasi kanë ndërtuar pa leje.
Menjëherë pas kësaj interviste të kryeministrit, përmes një shënimi në Facebook, Vasili thekson se Rama nga SHBA-të ka përbuzur shqiptarët.
Sipas tij, kryeministri shqiptar, është një kryeministër i egër me qytetarët.
Statusi i plotë
Kryeministri përbuz shqiptarët nga Amerika
Kryeministri Edi Rama ka folur për rastin e Shkozës gjatë një interviste në Zërin e Amerikës, këtë të premte.
“Shkoza s’përfaqëson asgjë dhe s’meriton besoj koment deri në Uashington dhe Nju Jork”.
Këto tha ky kryeministër i egër me qytetarët dhe superficial e i paditur si në çdo gjë që bën e thotë.
Për Kryeministrin, që llomotit nga Uashingtoni, shqiptarët duken hiçgjë, të vegjël dhe të parëndësishëm, pasi ky e ndjen veten të rëndësishëm dhe është shumë i lumtur me vanitetin e tij social dhe politik, pasi gëzon i shkreti që ndodhet atje.
Reagimet demode të shkollëpakut, që vijnë erë kutërbuese provincializme, humnere idesh dhe gëzimi qesharak si ai i shqiptarëve kur dilnin jashtë shtetit para viteve 90′, fjalët që thotë janë një komedi e zezë.
Ndaj, qytetarët janë të fundit për të, ndaj familjet e Shkozës që përballen sot me një hall e dhimbje të rëndë janë asgje përpara tij, ndaj dhe qëndrimi i tij është i egër e pa mëshirë edhe për femijët e Shkozës, që s’dinë se ku do të mësojnë dhe prindërit e tyre, që ndodhen përpara shkatërrimit pa kthim të djersës, gjakut dhe mundit shumëvjeçar.
