Kryeministri kroat, Andrej Plenkoviç është shprehur se ka besim se Shqipëria dhe Maqedonia e Veriut do të nisin shumë shpejt negociatat për anëtarësim në Bashkimin Evropian.
Plenkoviç ka thënë në një konferencë për mediat në Zagreb së bashku me presidentin e Këshillit Evropian, Charles Michel se shteti i tij është duke tentuar “të krijojë një klimë pozitive”, për t’u mundësuar këtyre dy shteteve arritjen e qëllimit të tyre.
Më 1 janar të këtij viti, Kroacia ka marrë kryesinë e presidencës së BE-së, e cila funksionon me rotacion çdo gjashtë muaj. Që prej asaj kohe Kroacia ka treguar se do të mbështesë Tiranën dhe Shkupin.
Franca dhe Holanda kanë penguar nisjen e bisedimeve për Shqipërinë dhe Maqedoninë e Veriut gjatë vitit të kaluar, duke nxitur zhgënjim dhe shqetësim për shkak të mundësisë së rritjes të ndikimit rus dhe atij kinez në Ballkanin Perëndimor.
Presidenti francez, Emmanual Macron ka thënë gjatë kësaj jave se dëshiron që samiti BE-Ballkan, i cili është caktuar të mbahet në muajin maj, “të jetë moment i unitetit” për Evropën. Zyrtarë të lartë kroatë kanë thënë se këto deklarata duket se janë shenjë që zgjidhja mund të gjendet para takimit të liderëve të bllokut evropian në muajin mars./Opinion.al/
