Kryeministri italian, Giuseppe Conte, tha se do të dorëhiqet, pas një vendimi nga partia në pushtet për të paraqitur një mocion mosbesimi ndaj qeverisë së koalicionit.
Duke iu drejtuar parlamentit, Conte tha se do t’ia dorëzonte dorëheqjen presidentit, Sergio Mattarella, i cili do të duhet të vendosë nëse dëshiron të thërrasë zgjedhje të parakohshme, ose të përpiqet të krijojë një koalicion të ri.
Vendimi për të dhënë dorëheqje vjen pas një sulmi të ashpër ndaj partnerit të koalicionit dhe njëherësh ministër i Brendshëm, Matteo Salvini. Conte tha se Salvini kishte qenë “i papërgjegjshëm” pasi krijoi një krize të re politike për Italinë për “interesa personale dhe partiake”.
Salvini, udhëheqësi i partisë nacionaliste të Liga-s, kishte ngritur një mocion mosbesimi kundër z. Conte. Ai tha se nuk mund të punonte më me partnerët e tij të koalicionit nga partia Pesë Yjet.
Ndërkaq lideri i partisë Pesë Yjet, Luigi di Maio, ka thënë se nuk dëshiron zgjedhje të reja, duke insistuar se reforma për parlament duhet të jetë në qendër të vëmendjes./Opinion.al
