Nga DESADA METAJ
TIRANE- Qëkur televizionet në Shqipëri nisen të transmetojnë live nga vendngjarjet, më shumë se çdo ngjarje, kamerat kanë transmetuar direkt fjalimet e kryeministrave.
Nuk ka rëndësi për çfarë aktiviteti bëhet fjale, çfarë mesazhi jepet apo me pak çfarë interesi ka për publikun. E rëndësishme është që Kryeministri të dalë mundësisht çdo ditë live në çdo TV. Në pak më shumë se 2 vjet Kryeministri Edi Rama ka dalë plot 389 herë në ekranet shqiptare. Sigurisht pak ose shumë mund të kenë qenë ato herë kur publiku ka ndjekur me vëmendje deklaratën e shefit të Qeverisë.
Në pjesën më të madhe të rasteve, daljet live në televizione janë thjeshtë rutinë e punës së një kryeministri, takime apo konferenca ku fjalimet zgjaten e zgjaten dhe bëhen të lodhshme edhe për ata që janë në sallë.
Sigurisht që kjo është mënyra që kreu i Qeverise ka zgjedhur për të organizuar marrëdhënien e tij me publikun, por në çdo rast daljet dhe transmetimet e drejteperdrejta në televizione janë kosto për buxhetin e shtetit. Po sot, PD në një deklarate të saj denoncon mijëra eurot që sipas saj janë shpërdoruar nga Qeveria për propagandë, ndërkohë që vendi po zhytet çdo ditë e më shumë në krizë.
Përtej deklaratës së saj, PD ka lënë paksa në harresë kohët kur Sali Berisha ishte Kryeministër dhe daljet e tij, në formë dhe në numër ishin thuajse identike me ato të pasardhësit. As Edi Rama, kritiku i madh i daljeve gati gati të përditshme të ish-Kryeministrit në televizion, duket se nuk i shpëtoi tundimit të transmetimit direkt në ekran të çdo aktiviteti kryeministror.
Ndërsa akuzat kanë ndërruar kahe, ajo qe mbetet e njëjtë, është shpenzimi për këto dalje dhe pakuptimi që i shoqëron ato. Ndoshta dikush duhet t’i kujtojë se ndonjëherë është mjaftueshëm show televiziv i së enjtes në Parlament.
Kamuflimin në aktivitetet e stisura e kanë të vështirë ta besojnë dhe organizatorët.
