Kryetarja e Lëvizjes Socialiste për Integrim, Monika Kryemadhi ka bërë akuza të rënda ndaj kryeministrit Rama duke e cilësuar sjelljen e tij ndaj Kosovës si anti-shqiptare.
Në një deklaratë të postuar në faqen e saj zyrtare në Facebook, Kryemadhi rendit çështjen e territoreve të Kosovës, tarifën ndaj Serbisë dhe nismën e ‘shengenit ballkanik’ si shembuj në të cilët sipas saj kryeministri Rama ka mbajtur qëndrim anti-shqiptar.
“Sjellja e tij ndaj Kosovës, eshte qartësisht antishqiptare: nuk mund të quhet ndryshe promovimi i shkëmbimit të territoreve midis Kosovës dhe Serbisë, që copëton jo vetëm Kosovën, por i vë zjarrin gjithë rajonit apo fishekzjarret e tij demagogjike për Shqipërinë e Madhe, nuk mund të quhet veçse destabilitet.
Nuk mund të quhet veçse antishqiptare një politikë presioni ndaj Kosovës për çështje të rëndësishme të marrëdhënies së saj me Serbinë, si ajo e taksës. Nuk mund të quhet ndryshe angazhimi në nisma rajonale, jo-transparente, pa qëllime e objektiva të qarta, si e ashtuquajtura Mini-shengen, duke përjashtuar dhe tradhëtuar Kosovën dhe duke fyer publikisht udhëheqësit e zgjedhur të Kosovës.”. /Opinion.al
