Sistemi zgjedhor të zgjidhet me referendum është propozimi i fundit që ka bërë kryetarja e Lëvizjes Socialiste për Integrim, Monika Kryemadhi.
Në një intervistë televizive, ajo foli për çështjen kryesore politike të këtyre ditëve, atë të reformës zgjedhore. Ndonëse ditën e djeshme u aludua se partitë e mëdha e lanë çështjen e ndryshimi të sistemit zgjedhor jashtë axhendës së marrëveshjes së tyre, disa prej tyre e kthyen atë sërish sot në vëmendje.
Kreu i demokratëve Basha tha se ishte i hapur ndaj çdo lloj sistemi ndërsa Kryemadhi sot u shpreh se kjo i duhet lënë në dorë popullit.
“Pse të mos ta ndryshojnë Kushtetutën shqiptarët, me votë, me referendum? A kemi mbledhur 50 mijë firma për referendum? Hajde të bëjmë referendumin dhe ta vendosin vetë shqiptarët se çfarë lloj referendumi do jetë. Hajde të bëjmë zgjedhje të lira, të kemi një Parlament legjitim dhe ligji i parë që do të miratohet të jetë ligji për Referendumet dhe shqiptarët të shkojnë në referendum për të vendosur për sistemin dhe të bëhemi gati për përgatitjen e sistemit të ri dhe për t’u sjellë shqiptarëve një risi në jetën politik”, tha ajo.
Më tej ajo bëri të ditur edhe preferencën e forcës së saj politike ndaj një sistemi proporcional me lista të hapura.
“Ndryshimi i sistemit nuk iu kërkua as PD-së dhe as LSI-së. Nuk ka trokitur në dyert tona qoftë dhe me një mesazh telefonik për të thënë që ne kemi këtë ide për sistemin, por ky sistem shkoi në Parlamentin ilegjitim dhe është dorëzuar tek Damian Gjiknuri. Tani përfaqësuesi i interesave të këtij propozimi dhe vjen dhe pala tjetër. Jemi për sistem proporcional, rajonal me lista të hapura si LSI, se ne kemi bërë grevë urie për sistemin. Në qoftë se ne do të kemi një sistem proporcional kombëtar të 140 deputetët do të dalin nga Tirana. Po ata në Kukës, Tropojë, Gjirokastër dhe Berat me kë do të përfaqësohen? 140 deputetët e Tiranës do të marrin votat e tyre këtu me njëri tjetrin”, u shpreh Kryemadhi. /Opinion.al
