Kryetarja e Lëvizjes Socialiste për Integrim, Monika Kryemadhi, ditën e sotme, ka deklaruar në Konventën Kombëtare, mbajtur në Pallatin e Sportit “Asllan Rusi”, se rrëzimi i Edi Ramës nga pushteti është një emergjencë kombëtare.
Kryemadhi tha se duhet një front opozitar, pasi kemi përballë një qeverisje arrogante dhe në lidhje me këtë nuk duhet humbur kohë, por duhet të përballemi.
Ajo tha se LSI është gati për një gjë të tillë dhe duhet të shkundë apatinë kolektive për hir të interesit të përbashkët kombëtar kundër rrezikut.
Sipas saj, tani është koha që shqiptarët të ngrihen në këmbë dhe të nisin marshimin e fitores së madhe.
Për një detyrë të tillë, kreu i LSI-së, deklaroi se kjo forcë politike do të jetë në krye të çdo marshimi.
Kryemadhi: Nuk kemi më kohë për të humbur me retorikën politike që bie në veshët e shurdhët të qeverisjes banditeske. Ne jemi gati të përballemi. Ne duhet të shkundim apatinë kolektive për hir të interesit të përbashkët kombëtar kundër rrezikut. Duhet të thyejmë heshtjen për ti dhënë zë qytetarëve që u kërcënohet jeta në rrugët e vendit. Koha tani të ngrihemi në këmbë të nisim marsimin e fitores së madhe, fitorja e shqiptarëve. LSI do të jetë në krye të çdo marshimi.
