Kryetarja e LSI, Monika Kryemadhi në konferencën e fundvitit tha se 2018 ishte një dështim për qeverinë. Kryemadhi tha se viti 2018 do të mbahet mend si viti i protestave, duke shtuar se viti 2019 të vijë për shqiptarët pa Edi Ramën në qeveri.
Kryemadhi: Viti 2018 ishte një vit dështimi dhe për aspiratën e shqiptarëve drejt BE. Të gjithë së bashku humbëm një vit drejt një procesi jetik siç është ai i negociatave. Për shkak të arrogancës politike. Humbëm një vit për shkak të korrupsionit dhe kapjes së qeverisë nga krimi i organizuar. Sigurisht që viti 2018 do të mbahet mend si viti i protestave, i cili filloi me protestën e opozitës në 27 Janar 2018. Vazhdoi më tutje me protestën e naftëtarëve për statusin e tyre. Me protestën e minatorëve, me protestën e biznesit të vogël, të cilët u ngritën për shkak të vendosjes së taksave të larta për ta dhe falimentimit dhe mbylljes së qepenave të tyre. Dhe si qershia mbi tortë, ishte protesta studentore e cila nuk erdhi vetëm si rezultat i Reformës së Dështuar në Arsim të Edi Ramës. Por erdhi si rezultat i varfërisë së familjeve të studentëve, erdhi si rezultat i mungesës së vendeve të punës. Erdhi si rezultat i shkatërrimit të ekonomisë shqiptare, erdhi si rezultat i varfërisë dhe i kapjes së shtetit nga Edi Rama dhe krimi i organizuar. Uroj që shqiptarët në 2019-ën të kenë një qeveri pa Edi Ramën, të kenë një qeveri të çliruar nga krimi dhe bandat e krimit të organizuar.
