Opozita zhvilloi ditën e sotme protestën e radhës në pesë qarqet kryesore të vendit.
Kryetarja e LSI, Monika Kryemadhi e ftuar në “Top Channel” është shprehur se protesta e sotme ishte paqësore për të treguar solidaritet me qytetarët e tjerë.
Kryemadhi tha se opozita ndryshoi strategji të protestës për shkak se kryeministri Edi Rama gjithmonë kur ka protesta para Kryeministrisë apo Kuvendit largohet duke mos u përballur me qytetarët.
Kryetarja e LSI, paralajmëroi Ramën duke thënë se për aq kohë sa është në krye të qeverisë fati i tij do të bëhet edhe më i zi.
“Ne nuk pamë qytetarë të irrituar, përkundrazi ishin solidarë. Pamë shumë makina që kishin hapur krahun në anë të rrugës, duke treguar solidaritet. Ky është një nga hapat që ka hedhur opozita, e do të ketë vazhdimësinë e saj. Gjithçka është në bazë të një strategjie dhe plani, që do të jetë i befasishëm. Pse? Sepse kryeministri është larguar gjithnjë sa herë ka pasur protesta dhe nuk ka tentuar të qëndrojë e të përballet me njerëzit. Kjo tregon frikën që ka ai, ose s’do të përballet me opinionin mbi këtë situatë.
Kjo është një zgjedhje e gabuar e Ramës, pasi një ditë ai do të përballet me njerëzit.
Kryemadhi tha se është çështje e Ramës nëse ikën apo nuk ikën, por “çdo ditë që ai qëndron, fati i tij bëhet gjithnjë e më i zi, meqë i ka qejf këto fallxhoret”,-tha Kryemadhi./ Opinion.al E.Xh.
