Monika Kryemadhi ka folur sot përpara protestuesve. Kryetarja e LSI-së ka akuzuar qeverinë dhe kryeministrin Rama për kushtet e vështira në të cilat jetojnë shqiptarët. Ndër të tjera, ajo është shprehur se opozita ka bërë shumë gabime dhe do të nisë reflektimi që nga Lulzim Basha e të gjithë me radhë.
“Është e vërtetë që edhe ne politikanët kemi gabimet tona, por më mirë vonë se sa kurrë. Djegia e mandateve ishte e vetmja mundësi për të treguar edhe një herë që interesi publik është edhe më i rëndësishëm se interesi i Ramës. Ishte një “mea culpa” ndaj jush motra dhe vëllezër. Janë bërë aq shumë gabime sa do na duhet të gjithëve së bashku shumë punë, që nga kryetari i PD-së Lulzim Basha, me të gjithë kolegët e tjerë, jo vetëm me kolegët që dogjën mandatet, por me gjithë ata burra dhe gra, pedagogë, biznesmenë, që nuk duan të ikin nga Shqipëria, duhet të hapim një etapë të re, duhet të sjellim erën e ndryshimeve. Shqipëria duhet të marrë bekimin e popullit të vet, për të pasur një Shqipëri të vërtetë europiane, jo një Shqipëri fasadë që mbështillet me flamurin e Bashkimit Europian, por nuk është gjë veçse një kullë e krimit, e orgjive politike”, tha ndër të tjera në fjalën e saj Kryemadhi.
“Rama është kryeministri më dështak që ka pasur Shqipëria, është kryeministri që i ka bërë më keq shqiptarëve në këto vite. Sot ne jemi një pjesë, por mendoni që janë qindra mijëra të tjerë në gjithë Shqipërinë, që na përkrahin ne”, deklaroi Kryemadhi./Opinion.al
