Kryetarja e Lëvizjes Socialiste për Integrim, Monika Kryemadhi ka mbajtur sot një takim me strukturat drejtuese të LSI në qytetin e Durrësit. Ajo i bëri të qartë anëtarëve dhe simpatizantëve të LSI se muajt e verës nuk do të jenë muaj pushimi por ata duhet të përgatiten për zgjedhje të reja.
“Falenderoj të gjithë anëtarët dhe simpatizantët e LSI që bojkotuan votimet moniste të 30 qershorit, pavarësisht presionit kriminal dhe trysnisë së pushtetit me bukën e gojës dhe vendin e punës. Muaji korrik dhe gusht nuk do të jenë muaj pushimi, por pune të plotë për zgjedhjet. Në këtë betejë jemi, jo për një zgjidhje të momentit për klasën politike, por për ndryshimin e sistemit për të tashmen dhe të ardhmen e shqiptarëve”, u shpreh Kryemadhi.
Më tej ajo shtoi se qeverisë po i del çdo ditë nga një skandal korrupsioni duke përmendur rritjen e çmimit të naftës. Sipas Kryemadhit, rritja e çmimit të naftës bëhet për favore klienteliste në dëm të ekonomisë së shqiptarëve.
“Çdo ditë në pushtet e Edit shoqërohet me një mega korrupsion. Në një javë dy skandale që e rrisin çmimin e naftës me 25 lekë për litër. Askush të mos mendojë që mund të gëzojë djersën, mundin dhe gjakun e shqiptarëve me kontrata korruptive. Rritja e çmimit të naftës nga dy aferat korruptive të Ramës do prekin jo vetëm xhepat e shqiptarëve, por do kenë edhe pasoja negative në gjithë ekonominë. Për dy oligarkë, do dëmtohen dhjetëra eksportues dhe mijëra prodhues në bujqësi”, përfundoi kryetarja e LSI. /Opinion.al
