Kryetarja e LSI-së, Monika Kryemadhi ishte sot në Shkodër, nga ku iu bashkua protestës së banorëve të Unazës së Re, që kundërshtojnë vendimin e qeverisë që kërkon të shembë banesat e tyre pa u dëmshpërblyer.
Kryemadhi denoncoi Ramën se me anë të këtij projekti po kërkon të sigurojë hapësira ndërtimi për oligarkët e tij.
Po kështu Kryemadhi tha se Rama po synon devijimin e shtratit të Lanës.
“Po e bën me qytetarët e Tiranës, ku i mashtroi dhe i intimidoi dhe i kërcënoi për ti marrë votën në 2017, tashmë sposton shtratin e Lanës për të krijuar hapësira ndërtimi për oligarkët dhe për klientët e tij me të ashtuquajturën “rrugë”.
Të na thotë Edi Rama dhe kryetari i Bashkisë së Tiranës, sa kushton projekti i rrugës që ai do të ndërtojë mbi pronat e qytetarëve? Ku do ti gjejë paratë dhe si do të financohen këto projekte? Përse duhet të prishen aq shumë ndërtime dhe aq shumë biznese për një projekt të tillë që në fakt nuk janë më shumë se 100 shtëpi?
Përse Edi Rama po i kursen paratë për të kontribuar dhe për ti dëmshpërblyer qytetarët? 22 vjet këta banorë dhe këta qytetarë kanë paguar taksat e shtetit shqiptar, taksë pastrimi, taksë gjelbërimi e të gjitha me radhë. Ashtu siç kanë paguar nga 2-3 herë faturat për të legalizuar pronat e tyre.
Jo nga pak lekë, por me miliona, me miliona dhe me miliona pafundësisht dhe pa llogaritur allishverishet që ne rëndomë i kemi parë se çfarë ka ndodhur në zyrat e ALUIZNI-t”, tha Kryemadhi.
