Kryetarja e Lëvizjes Socialiste për Integrim Monika Kryemadhi ka folur nga Durrësi, ku po udhëheq protestën e opozitës në këtë qark. Kryemadhi ka thënë se ajo që po bën opozita nuk mund të quhet ende mosbindje civile, duke e quajtur kryeministrin Edi Rama një të çmendur që ka marrë peng një parti dhe disa godina.
“Këta nuk e kanë kuptuar që mosbindja civile s’ka filluar ende. Shqiptarët janë të gatshëm për t’u përballur me këtë gjenocid heshtës që ka bërë Edi Rama. Gjenocidet kanë krijuar shpërngulje kudo në botë. Ky është një gjenocid heshtur ndaj të rinjve. Një i çmendur ka marr peng një parti politike dhe disa godina. Opozita nuk ka për qëllim pushtimin e godinave dhe as të rrugëve, por opozita kërkon të pushtojë zemrat e qytetarëve. Ne duhet t’i ngjallim shpresën shqiptarëve, pasi po shkatërrohet ajo pak që ka ngelur nga historia jonë”, ka thënë Kryemadhi.
Gjatë fjalës së saj për mediat, ajo ka lënë të kuptohet se aksioni i opozitës mund të përshkallëzohet duke filluar nga java e ardhshme.
“Ne do bëjmë çdo lloje proteste apo lëvizje politike për të sensibilizuar shqiptarët, por jemi të përgatitur deri në pikën e fundit, për t’i thëne Edi Ramës që këtë popull nuk e merr dot me dhunë. Ne po i provojmë të gjitha, nuk është problem për ta rrethuar Parlamenti dhe për ta marrë Parlamentin. Këtë javë bllokuam 12 akse, javës tjetër nuk i dihet se çfarë do bllokojmë”, deklaroi Kryemadhi./Opinion.al
