E pyetur për rolin e ndërkombëtarëve në lidhje me krizën politike në Shqipëri, kryetarja e partisë së dytë më të madhe opozitare, Monika Kryemadhi ka deklaruar se “ndërkombëtarët janë turisë dhe jo zot”.
Në një intervistë televizive, Kryemadhi theksoi se asnjë ndërkombëtar nuk ka mbështetur zgjedhjet e 30 qershorit. Kjo sipas saj ndodh sepse asnjë ndërkombëtar nuk mund të dalë kundër Kushtetutës. Nëse ata do ta bënin këtë atëherë kjo do të përbënte shkelje të sovranitetit të një vendi anëtar të NATO-s. Ajo shtoi gjithashtu se prej katër vitesh në Shqipëri nuk vjen asnjë investitor i huaj por vetëm kompani fantazmë që marrin paratë nga Shqipëria dhe ikin.
“Më gjej një ndërkombëtar që ka përshëndetur zgjedhjet. Shqipëria është vend sovran dhe nuk ka ambasador që të dalë kundër Kushtetutës. Le të guxojnë të dalin kundër dekretit të presidentit të tyre. Nëse shkohet në gjykatë ndërkombëtare, del se shkelin sovranitetin e një vendi anëtar të NATO-s. Ndërkombëtarët janë turistë, jo zot. Ka prej 4 vitesh që s’ka këtu më as investitorë të huaj, këtu ka prej 4 vitesh kompani fantazmë që vijnë. Ne nuk kemi investitorë të huaj që i dalin garant shtetit shqiptar, por kompani që marrin para nga Shqipëria dhe ikin”, tha Kryemadhi.
Kryemadhi deklaroi gjithashtu se opozita po kërkon të ndërgjegjësojë ata ndërkombëtarë që mbështesin kryeministrin. Por shtoi gjithashtu se lufta nuk është kundër Edi Ramës por kundër sistemit.
“Është beteja për të shembur sistemin, jo Edi Ramën. Të gjithë flasin për integrimin e BE-në, por këtë e kemi nisur para Kroacisë, ndërsa sot Kroacia vendos sot për ne ndërsa ne jemi jashtë. Kemi qenë ndër të parët që kemi nisur procesin, dhe jemi të fundit. E kam thënë dhe e them, nuk kemi frikë nga Edi Rama për të shkuar në zgjedhje me të. Debati politik nuk është Edi Rama, janë standardet. Nuk diskutohet çështja për zgjedhje të lira e të ndershme. Ky person është një person që nuk rri dot pa futur duart në xhepat e të tjerëve” tha ndër të tjera Kryemadhi. /Opinion.al
