Deputetja e Partisë së Lirisë, Monika Kryemadhi, e cila vazhdimisht ka publikuar fakte dhe ka denoncuar aferën e inceneratorëve, ka reaguar pas lajmeve të publikuara në media se bosët e inceneratorëve kanë paguar bileta avioni për zyrtarë si zvendës presidenti i FSHF, Arben Dervishaj apo dhe Etleva Kondi, anëtare e Komisionit të Dhënies së Koncesionit.
Përmes një postimi në Facebook, Kryemadhi shtron pyetjen nëse 800 mln lekët që ka harxhuar inceneratori i Tiranës për udhëtime a është financuar ndonjë fluturim VIP për ndonjë ministër apo dhe për shoqëruset e tyre?
“Qenkan mbushur mediat me lajme se inceneratorët kanë paguar bileta avioni për zyrtarët e shtetit. Po 800 milionë lekët që ka harxhuar inceneratori i Tiranës për udhëtime, kanë financuar ndonjë fluturim VIP, për ndonjë ministër dhe deputet Rilindas, apo për shoqërueset e tyre?”, shkruan Monika Kryemadhi.
Ditën e sotme u publikuan lajmet se SPAK ka zbuluar se në të paktën dy raste, Arben Dervishaj ka udhëtuar drejt Italisë për të ndjekur ndeshje të Champions League, me shpenzime të Klodian Zotos.
Po ashtu ai ka paguar një udhëtim të Etleva Kondit, anëtare e Komisionit të Dhënies së Koncesionit. Ajo ka udhëtuar në shoqërinë e vajzës së saj, si edhe biznesmenit Mirel Mërtiri dhe Arenc Myrtezani, që më pas u bë administrator i koncesionarit.
