Kryetari i Bashkisë së Tiranës, Erion Veliaj ka nisur një tur takimesh në 24 njësitë vendore duke bërë një bilanc të punës 2 vjecare dhe duke kërkuar vota për PS-në. Ai tha se Bashkia do të vijojë me investimet e saj në të gjithë kryeqytetin pa bërë asnjë diferencim mes qendrës dhe periferisë.
“Kur thamë, nuk do të presim katër vjet që të bëjmë një bilanc, nuk do të presim katër vjet që t’u raportojmë si e trajtuam besimin dhe votën që njerëzit na dhanë, ne nuk do të presim katër vjet që pastaj kur të vijë prapë fushata të kujtohemi për njerëzit, ne do të jemi jo vetëm çdo vit në një raport por ne kemi qenë çdo muaj, çdo ditë me një punë konkrete dhe të prekshme”, tha Veliaj.
Kreu i Bashkisë deklaroi se Tirana nuk është më në gjumë siç ishte në kohën e Lulzim Bashën, ndaj u kërkon qytetarëve të votojnë PS-në më 25 Qershor në mënyrë që të mos ndalen as punët e Bashkisë.
“Asnjë në Tiranë nuk është aq budalla që pasi të ketë parë çfarë ndryshimesh ka parë Tirana ta ndërrojë zgjimin me gjumin, punën me gërhimën. Në qoftë se demokratët duan të kthehen prapë te gjumi le të kthehen, por unë besoj që ne i kemi respektuar dhe u kemi shërbyer njësoj. Ndaj ju themi dhe demokratëve që në në këto zgjedhje, zgjedhim shërbëtorë për popullin, jo sundimtarë, shërbëtorë që i shërbejnë njësoj njerëzve pa diferencim”, tha Veliaj.
Veliaj komentoi edhe listën për deputetë të Lulzim Bashës, duke i quajtur humbës dhe duke përmendur, Grida Dumën, Fatmir Mediun, etj.
“Humbësi i bashkisë sot sjell dhe kandidatin tjetër që humbi. Ishte burrë shumë i mirë, por e rrrafëm me 50 mijë vota. Marrin dhe Gridën që refuzoi Durrësi. Që ta kompletojnë listën sjellin dhe Fatmir Mediun. Unë mendoja ta bëjmë Gërdecin si Tirana. Propozimi i tyre është ta bëjnë Tiranën si Gërdeci. Në asnjë mënyrë. Është shakaja më e poshtër që mund ti bësh këtij qyteti. Kjo ishte republika e re 90 ditë në çadër për ti thënë Tiranës nuk e duam punën, duam gjumin dhe kjo është oferta jonë, oferta e humbësve. Dhe qershia mbi tortë, vjen në Tiranë me Saliun. Përgjigjja e Tiranës është jo”, u shpreh Veliaj. /Opinion.al
