Ka vizituar sot Tiranë, Michael Häupl, kryetar i Bashkisë së Vjenës. Gjatë takimit me të, Kryebashkiaku i Tiranës, Erion Veliaj tha se Vjena është “pikë reference për mënyrën e menaxhimit të qyteteve”.
“Sot kemi dakordësuar se do të bashkëpunojmë në disa fusha, kryesisht për zhvillimin urban dhe për akomodimin demokrafik të rritjes së popullsisë. Do të kemi një seancë të dytë në nivel ekspertësh gjatë verës ose në fillim të vjeshtës për të diskutuar çështje të urbanistikës dhe për të marrë mbështetje nga Viena për çështje të zhvillimit urban, të arkitekturës, të transportit publik, të vetëmenaxhimit financiar të qytetit”, deklaroi Veliaj.
Kryetari i Bashkisë së Vienës, Michael Häupl, e cilësoi tepër të prekshëm transformimin që ka pësuar Shqipëria dhe Tirana, ndërsa garantoi për rritje të bashkëpunimit mes dy qyteteve.
Bashkia e Vienës do t’i dhurojë kryeqytetit disa nga stolat karakteristikë të Vienës të lagjes së saj muzeale të cilat do të vendosen në sheshin “Skënderbej”.
Ndërkohë, kryetari i Bashkisë së Tiranës, Veliaj dhe kryetari i Bashkisë së Vienës, Häupl morën pjesë dhe në emërtimin e një prej rrugëve të kryeqytetit me emrin “Viena”, si një shenjë e miqësisë mes dy vendeve tona.
Sakaq, kryebashkiaku Michael Häupl u nderua nga Veliaj me “Çelësin e Tiranës”.
