Kryetari i Bashkisë së Rrogozhinës, Edison Memolla është parë në dyert e Prokurorisë së Posaçme kundër Korrupsionit dhe Krimit të Organizuar.
Mësohet se Memolla ishte i shoqëruar nga avokati i tij dhe është marrë i pandehur nga SPAK nën akuzë për korrupsion në zgjedhjet e pjesshme të 6 marsit 2022.
Bëhet fjalë për një përgjim sipas të cilit pretendohet se Memolla paguante faturat e energjisë elektrike të qytetarëve të Rrogozhinës në këmbim të votave.
Regjistrimi i bisedës telefonike raportohet se është bërë në prag të zgjedhjeve të pjesshme të 6 marsit 2022. Sipas ReportTv, mësohet se për këtë akuzë, Memolla po hetohet nga prokurori Edvin Kondili.
Memolla është parë mesditën e sotme duke dalë nga Prokuroria nën shoqërinë e avokatit të tij, ku mësohet se i është komunikuar akuza.
Më herët në prill të këtij viti ai është paraqitur në SPAK mbi dyshimet se ka bërë punësime fiktive në bashki.
