Kryebashkiakja e Durrësit, Valbona Sako, u shpreh se duhet “të jemi të kënaqur me 50 viktima”, pasi sipas saj në vende të tjera tërmete të tilla kanë shkaktuar mijëra të vdekur.
“Për hir të së vërtetës duhet ta themi, ky ishte një tërmet i nivelit shkatërrimtar. Por të jemi të kënaqur edhe me 50 viktima, për arsye se në raste të tjera kanë qenë mbi një mijë viktima.”, tha Sako në një intervistë.
Përpos faktit që janë 51 viktima deri më tani, duket se kryebashkiakja po has vështirësi dhe po bën gafa të njëpasnjëshme në dhënien e informacioneve lidhur me situatën kaotike në të cilën ndodhen qytetarët e Durrësit.
Kujtojmë se më herët lidhur me procesin e akomodimit të banorëve të pastrehë, Sako tha se ata shkojnë në hotele me pesë yje, të cilat në kushte normale nuk do të mund ti paguanin për pushime.
“Qytetari paraqitet në Bashkinë e Durrësit, krijojmë një lëvizje të organizuar me transport dhe i çojmë në pikat e akomodimit, që janë hotele me kushtet më të mira. Do të thoja janë hotele me pesë yje, që në kushte normale zotërinjtë nuk do të mund t’i paguanin për pushime,” tha ndër të tjera ajo.
Përpos përpjekjes për të kuptuar kontekstin e deklaratave të saj, fjalët e Sakos janë shpërndarë gjerësisht në rrjete sociale duke u konsideruar aspak njerëzore dhe etike pasi shumë familje kanë humbur të afërmit, banesat dhe janë të traumatizuar pas tërmetit që goditi vendin mëngjesin e së martës./Opinion.al
