Krerët e bashkive të djathta janë shprehur se nuk do të lirojnë zyrat e bashkisë, për krerët e rinj të bashkive të cilët dolën nga zgjedhjet e 30 qershorit.
Pas daljes nga takimi me kreun e PD-së Lulzim Basha në selinë blu, Xhelal Mziu ka theksuar se ai nuk do të largohet nga zyra, pasi sipas tij, ky është vendimi i 85% të shqiptarëve që nuk votuan më 30 qershor.
Pyetje:Edhe nëse jua kërkon Lulzim Basha nuk do të dilni nga zyra?
Mziu:Nuk ka lidhje Lulzim Basha. Ne interpretojmë ligjin dhe kemi lexuar votat popullore. Ky është mendimi i shumicës së shqiptarëve, 85%,-tha Mziu.
Të njëjtin qëndrim ka mbajtur dhe kryetari i bashkisë së Mallakastrës,Agron Kapllanaj.
“Ka shumë probleme të tjera që kemi diskutuar dhe jo vetëm për të liruar zyrat apo jo. Ne hap pas hapi po bëjmë të gjitha denoncimet tona, të gjitha provat që kemi grumbulluar. Kemi monitoruar votime të një procesi farsë. Ne do ta lirojmë zyrën kur të vijë pasardhësi jonë i zgjedhur sipas ligjit dhe i konfirmuar nga të gjitha institucionet. Pra, kur të ketë zgjedhje dhe jo votime. Ky është vendim i marrë nga e gjithë opozita. Ky është një vendim që ne e kemi shprehur disa herë që këto zgjedhje ishin farsë dhe ne nuk i njohim. Ne do të vazhdojmë të qëndrojmë në detyrën tonë për sa kohë të bëhen zgjedhje të rregullta. Zyrën nuk e mbajmë me dhunë, por do t’iu shërbejmë qytetarëve”, tha Kapllanaj./Opinion.al E.Xh.
