Negociatat me ndërmjetësimin e dy eurodeputetëve McAllister dhe Fleckenstein kanë dështuar mes mazhorancës dhe opozitës për t’i dhënë fund krizës politike.
Takimet e ditës së sotme janë zhvilluar në Pallatin e Kongreseve në disa raunde. Mirëpo në të fundit, Basha është larguar i pari.
Mësohet se Basha nuk ka hequr dorë nga kushti i tij për qeveri teknike. Nga ana tjetër, kryeministri Rama ka pranuar që të lëshojë shumë nga ana e Policisë së Shtetit, si shkarkime të drejtuesve aktualë dhe dha garanci për mospërfshirjen e saj në zgjedhje.
Gjithashtu, Rama ka pranuar që të shtohet numri i vëzhguesve të zgjedhjeve, por kurrsesi s’ka pranuar qeverinë teknike.
Në këtë mënyrë, Basha nuk ka pranuar të ulet në negociatë me të dhe është larguar nga Pallati i Kongreseve.
