Një ditë pas sekuestrimit të një sasie të madhe kanabisi në fshatin Derven të Krujës mësohet se sasia e drogës, e thatë dhe gati për transport, është 1.3 ton. Gazetari Artan Hoxha tha se nga peshimi sot ka rezultuar se është 1.3 ton dhe jo 1.2 siç u raportua një ditë më parë. Gjithashtu ai thotë se gjatë natës janë ndaluar 11 persona që dyshohet se kanë punuar si roje apo punëtorë të kanabisit.
Operacioni i policisë u zhvillua dje por edhe sot në zonë ka forca të shumta policie. Për praninë e drogës ishte siguruar informacion nga Shërbimi Informativ Shtetëror dhe organi i Prokurorisë dhe më pas, në bashkëpunim me Policinë e Shtetit, u organizua operacioni blic në Krujë ku u kap një sasi shumë e madhe kanabis, e tharë dhe gati për tu transportuar.
Nga ana e Policisë mësohet se është ushtruar kontroll në 6 banesa dhe në një magazinë. Po dje, pas të dhënave të para të operacionit, reagoi kryetari i Partisë Demokratike, Lulzim Basha. Në një postim në Facebook ai denoncoi se droga e bllokuar është në pronësi të kryebashkiakut të Krujës, Artur Bushi.
Sasi të ngjashme droge janë kapur më parë edhe në Vlorë e Mat.
