TIRANË-Për 3 vite, plot 62 zona minerare do të mbyllen. Vendimi është marrë sot (e mërkurë) nga Qeveria dhe është bërë publik nga ministri i Energjisë, Damian Gjiknuri. Në rajonin krommbajtës të Bulqizës, do të ndalohet ushtrimi i aktivitetit minerar në një pjesë të Zonës D e cila konsiderohet me rrezikshmëri për jetën.
“Vendimi rishikon dhe përcakton 62 zonat e rrezikshme minerare, kryesisht në Bulqizë dhe Batër, në të cilat do të jetë e ndaluar dhënia e lejeve dhe ushtrimi i aktivitetit minerar”. Kështu u shpreh Gjiknuri në një dalje për mediat pas mbledhjes së qeverisë.
“Do të revokohen tërësisht lejet kur zonat tyre të shfrytëzimit janë vendosur në pjesën më të madhe mbi zonën e rrezikshme. Gjithashtu, do revokohen pjesërisht lejet kur zonat e tyre të shfrytëzimit janë vendosur një pjesë mbi zonën e rrezikshme”, vijoi ai më tej.
Në total, janë rreth 18 leje shfrytëzimi të cilat do të revokohen duke patur si objektiv kryesor rritjen e sigurisë në punë dhe ndalimin e aktivitetit në pjesën e rrezikshme.
Për të gjitha vdekjet e nëntokës, Gjiknuri ia vuri fajin Qeverisë Berisha, e cila sipas tij, për 8 vite kishte dhënë 800 lejë per shfrytëzim kromi.
