“Bashkëpunim për çeljen e negociatave. Të fitojmë mundësinë e çeljes së negociatave. Apeli nga ana ime është reflektim dhe bashkëpunim”. Ky ishte mesazhi që Presidenti Ilir Meta dha nga Lezha, pasi u pyet nga gazetarët për një takim mes kryeministrit Edi Rama dhe kryedmeokratit Lulzim Basha.
Ishte ministri Pandeli Majko ai që gjatë se premtes, nga Samiti i Diasporës hodhi idenë që Presidenti Meta mund të ishte negociator. Më pas në një studio televizive, këtë ide e mbështeti me ministri Blendi Çuçi.
Zoti President, a do të merrni iniciativën për të ulur në një tryezë të përbashkët palët politike?
Besoj mesazhi i 2 marsit është më se aktual: Duhet të punojmë për bashkim dhe bashkëpunim, jo vetëm çdo 2 Mars e 28 Nëntor, por çdo ditë, në mënyrë që ta fitojmë mundësinë për çeljen e negociatave në qershor, bashkë edhe me Maqedoninë e Veriut.
Zoti Basha sapo tha se takimi do të jetë vetëm me qytetarët, me askënd tjetër. E ka refuzuar ftesën e zotit Rama.
Nuk kam asnjë koment sot. I vetmi apel është për bashkëpunim, për bashkim, për reflektim për të parë më larg.
Burime nga Presidenca thonë se tani për tani Ilir Meta po “vazhgon nga lart” situatën politike dhe ende nuk ka vendosur nëse mund të krijojë një tryezë dialogu. Krerët e mëparshëm të shtetit e kanë bërë. Në 2006 rol të rëndësishëm mori ish-Presidenti, Alfred Moisiu. Ishte aktori kryesor i uljes në një tavolinë të shumicës dhe opozitës dhe arritjes së marrëveshjes mes tyre për zgjedhjet duke shpëtuar vendin nga kriza. Më pas, në vitin 2010 e bëri Bamir Topi. Gjatë këtij viti zoti Topi realizoi takime me Sali Berishën që ishte kryeministër dhe Edi Ramën, që drejtonte opozitën. Opozita në atë kohë kishte bojkotuar Parlamentin./ Opinion.al
